ಜಿ.ಪಂ ಚುನಾವಣೆ:‘ಕುಂಸಿ ಕ್ಷೇತ್ರಕ್ಕೆ ಬೇಕು ಹೊಸ ತಲೆಮಾರಿನ ನಾಯಕತ್ವ’; ‘ಹಿರಿಯರಿಗಷ್ಟೇ ಮಣೆ ಹಾಕದೆ ಹೊಸಬರಿಗೂ ಅವಕಾಶ ಸಿಗಲಿ’

ಜಿಲ್ಲಾ ಪಂಚಾಯಿತಿ ಹಾಗೂ ತಾಲ್ಲೂಕು ಪಂಚಾಯಿತಿಗಳ ಕ್ಷೇತ್ರಗಳ ಮೀಸಲಾತಿ ಕರಡು ಪಟ್ಟಿಯನ್ನು ರಾಜ್ಯ ಸರ್ಕಾರ ಪ್ರಕಟಿಸಿದೆ. ಇದರ ಬೆನ್ನಲ್ಲೇ ಕುಂಸಿ ಜಿಲ್ಲಾ ಪಂಚಾಯಿತಿ ಕ್ಷೇತ್ರದಲ್ಲಿ ರಾಜಕೀಯ ಚಟುವಟಿಕೆಗಳು ಗರಿಗೆದರಿವೆ. ಈ ಬಾರಿ ಕ್ಷೇತ್ರದಲ್ಲಿ ಹೊಸ ಮುಖಗಳಿಗೆ ಅವಕಾಶ ಸಿಗಲಿದೆಯೇ ಅಥವಾ ಈಗಾಗಲೇ ರಾಜಕೀಯದಲ್ಲಿ ಗುರುತಿಸಿಕೊಂಡಿರುವ ಹಿರಿಯ ನಾಯಕರೇ ಮತ್ತೊಮ್ಮೆ ಮುಂಚೂಣಿಗೆ ಬರಲಿದ್ದಾರೆಯೇ ಎಂಬ ಚರ್ಚೆ ಆರಂಭವಾಗಿದೆ. ಇದು ಕೇವಲ ಅಭ್ಯರ್ಥಿಗಳ ಆಯ್ಕೆಯ ಪ್ರಶ್ನೆಯಲ್ಲ. ಸ್ಥಳೀಯ ರಾಜಕೀಯದಲ್ಲಿ ಹೊಸ ತಲೆಮಾರಿನ ನಾಯಕತ್ವಕ್ಕೆ ಅವಕಾಶ ಸಿಗುತ್ತದೆಯೇ ಎಂಬ ಮಹತ್ವದ ಪ್ರಶ್ನೆಯೂ ಹೌದು.

ಕರಡು ಪಟ್ಟಿಯ ಪ್ರಕಾರ ಕುಂಸಿ ಜಿಲ್ಲಾ ಪಂಚಾಯಿತಿ ಕ್ಷೇತ್ರವನ್ನು ಹಿಂದುಳಿದ ವರ್ಗ ‘ಅ’ಕ್ಕೆ ಮೀಸಲಿಡಲಾಗಿದೆ. ಮೀಸಲಾತಿಯ ಅಂತಿಮ ನಿರ್ಧಾರದ ಬಳಿಕ ಅಭ್ಯರ್ಥಿಗಳ ಆಯ್ಕೆ ಪ್ರಕ್ರಿಯೆ ಚುರುಕುಗೊಳ್ಳಲಿದೆ. ಈ ಸಂದರ್ಭದಲ್ಲಿ ರಾಜಕೀಯ ಪಕ್ಷಗಳು ಸಾಂಪ್ರದಾಯಿಕ ಲೆಕ್ಕಾಚಾರಗಳಿಗೆ ಸೀಮಿತವಾಗದೆ, ಹೊಸ ತಲೆಮಾರಿನ ಅಭ್ಯರ್ಥಿಗಳಿಗೂ ಅವಕಾಶ ನೀಡುವ ಬಗ್ಗೆ ಗಂಭೀರವಾಗಿ ಚಿಂತಿಸಬೇಕು. ಚುನಾವಣೆಯಲ್ಲಿ ಗೆಲ್ಲುವ ಸಾಧ್ಯತೆಯೊಂದೇ ಮಾನದಂಡವಾಗದೆ, ಕ್ಷೇತ್ರದ ಅಭಿವೃದ್ಧಿಗೆ ಹೊಸ ದೃಷ್ಟಿಕೋನ ನೀಡಬಲ್ಲವರು ಯಾರು ಎಂಬುದನ್ನೂ ಪರಿಗಣಿಸಬೇಕು.

ಜಿಲ್ಲೆಯ ರಾಜಕೀಯದಲ್ಲಿ ಹಲವು ವರ್ಷಗಳಿಂದ ಸಕ್ರಿಯರಾಗಿರುವ ಅನುಭವಿ ಹಿರಿಯ ನಾಯಕರು ಪಕ್ಷದಲ್ಲಿ ಪ್ರಮುಖ ಹುದ್ದೆಗಳನ್ನು ಅಲಂಕರಿಸಿದ್ದಾರೆ. ಪಕ್ಷ ಸಂಘಟನೆ, ಚುನಾವಣಾ ನಿರ್ವಹಣೆ ಮತ್ತು ಆಡಳಿತದ ವಿಚಾರದಲ್ಲಿ ಅವರು ಅನುಭವ ಹೊಂದಿರುವುದು ಸಹಜ. ಅವರ ಸೇವೆ ಮತ್ತು ಅನುಭವವನ್ನು ಕಡೆಗಣಿಸುವ ಅಗತ್ಯವಿಲ್ಲ. ಆದರೆ ಈಗಾಗಲೇ ಪಕ್ಷದಲ್ಲಿ ಹಲವು ಉನ್ನತ ಹುದ್ದೆಗಳನ್ನು ನಿರ್ವಹಿಸಿರುವ, ಮುಂದಿನ ವಿಧಾನಸಭಾ ಚುನಾವಣೆಯಲ್ಲಿಯೂ ಸ್ಪರ್ಧಿಸುವ ಆಕಾಂಕ್ಷೆ ಹೊಂದಿರುವ ಹಿರಿಯ ನಾಯಕರು ಜಿಲ್ಲಾ ಪಂಚಾಯಿತಿ ಚುನಾವಣೆಯಲ್ಲೂ ಅವಕಾಶ ಬಯಸಿದರೆ, ಹೊಸಬರಿಗೆ ರಾಜಕೀಯ ಪ್ರವೇಶದ ದಾರಿ ಎಲ್ಲಿ ಉಳಿಯುತ್ತದೆ ಎಂಬ ಪ್ರಶ್ನೆ ಎದುರಾಗುತ್ತದೆ.

ಜಿಲ್ಲಾ ಪಂಚಾಯಿತಿ ಚುನಾವಣೆಯಲ್ಲಿ ಗೆಲುವು ಸಾಧಿಸಿದ ಬಳಿಕ ಅದನ್ನು ಮುಂದಿನ ವಿಧಾನಸಭಾ ಚುನಾವಣೆಗೆ ರಾಜಕೀಯ ನೆಲೆ ಬಲಪಡಿಸಿಕೊಳ್ಳುವ ಅವಕಾಶವಾಗಿ ಬಳಸಿಕೊಳ್ಳುವ ಸಾಧ್ಯತೆಯೂ ಚರ್ಚೆಗೆ ಗ್ರಾಸವಾಗಬಹುದು. ತಮ್ಮ ಸ್ವಕ್ಷೇತ್ರದಿಂದ ವಿಧಾನಸಭೆಗೆ ಸ್ಪರ್ಧಿಸುವ ಉದ್ದೇಶ ಹೊಂದಿರುವ ನಾಯಕರು ಮತ್ತೊಂದು ಕ್ಷೇತ್ರದ ಜಿಲ್ಲಾ ಪಂಚಾಯಿತಿ ಚುನಾವಣೆಯಲ್ಲಿ ಸ್ಪರ್ಧಿಸಲು ಮುಂದಾದರೆ, ಸ್ಥಳೀಯವಾಗಿ ರಾಜಕೀಯ ಬೆಳವಣಿಗೆಗೆ ಕಾಯುತ್ತಿರುವ ಹೊಸ ಮುಖಗಳ ಸ್ಥಿತಿ ಏನಾಗಬೇಕು? ಇಂತಹ ಪ್ರಶ್ನೆಗಳಿಗೆ ರಾಜಕೀಯ ಪಕ್ಷಗಳು ಸ್ಪಷ್ಟ ಉತ್ತರ ನೀಡಬೇಕಿದೆ. ಇದು ಯಾರೊಬ್ಬರ ರಾಜಕೀಯ ಮಹತ್ವಾಕಾಂಕ್ಷೆಯನ್ನು ಪ್ರಶ್ನಿಸುವುದಲ್ಲ. ಎಲ್ಲರಿಗೂ ಅವಕಾಶ ಕಲ್ಪಿಸುವ ರಾಜಕೀಯ ವ್ಯವಸ್ಥೆಯ ಅಗತ್ಯವನ್ನು ಎತ್ತಿಹಿಡಿಯುವುದಾಗಿದೆ.

ಒಬ್ಬ ವ್ಯಕ್ತಿಗೆ ರಾಜಕೀಯದಲ್ಲಿ ಮತ್ತೆ ಮತ್ತೆ ಅವಕಾಶ ದೊರೆಯುವಾಗ, ಮೊದಲ ಬಾರಿಗೆ ಅವಕಾಶ ನಿರೀಕ್ಷಿಸುತ್ತಿರುವ ಯುವಕರಿಗೆ ಪಕ್ಷ ಯಾವ ಸಂದೇಶ ನೀಡುತ್ತದೆ? ಪಕ್ಷಕ್ಕಾಗಿ ದುಡಿಯಬೇಕು, ಜನರ ನಡುವೆ ಇರಬೇಕು, ಸಂಘಟನೆಯನ್ನು ಬಲಪಡಿಸಬೇಕು ಎಂಬ ನಿರೀಕ್ಷೆ ಯುವಕರಿಂದ ಇರುತ್ತದೆ. ಆದರೆ ನಿರ್ಣಾಯಕ ಸಂದರ್ಭದಲ್ಲಿ ಟಿಕೆಟ್‌ಗಳು ಮತ್ತೆ ಮತ್ತೆ ಪರಿಚಿತ ಮುಖಗಳ ಪಾಲಾದರೆ, ಅವರ ಪರಿಶ್ರಮಕ್ಕೆ ಮೌಲ್ಯ ಸಿಗುತ್ತಿದೆಯೇ ಎಂಬ ಅನುಮಾನ ಮೂಡುವುದು ಸಹಜ. ಅರ್ಹತೆ ಮತ್ತು ಸೇವೆಯ ಆಧಾರದಲ್ಲಿ ಅವಕಾಶ ದೊರೆಯುವುದಿಲ್ಲ ಎಂಬ ಭಾವನೆ ಬಲಗೊಂಡರೆ, ಹೊಸ ತಲೆಮಾರಿನವರು ರಾಜಕೀಯದಿಂದ ದೂರ ಸರಿಯುವ ಅಪಾಯವಿದೆ.

ರಾಜಕೀಯವೆಂದರೆ ಕೇವಲ ಚುನಾವಣೆ ಎದುರಿಸುವುದಲ್ಲ. ಗ್ರಾಮಗಳ ಸಮಸ್ಯೆಗಳಿಗೆ ಸ್ಪಂದಿಸುವುದು, ಜನರ ಹಕ್ಕುಗಳಿಗಾಗಿ ಧ್ವನಿ ಎತ್ತುವುದು, ಪಕ್ಷದ ಸಂಘಟನೆಯನ್ನು ಬಲಪಡಿಸುವುದು ಮತ್ತು ಸಾರ್ವಜನಿಕ ಸೇವೆಯಲ್ಲಿ ತೊಡಗಿಸಿಕೊಳ್ಳುವುದು ಅದರ ಭಾಗಗಳಾಗಿವೆ. ಇಂತಹ ಕೆಲಸಗಳಲ್ಲಿ ತೊಡಗಿಸಿಕೊಂಡ ಯುವಕರಿಗೆ ಚುನಾವಣೆಯಲ್ಲಿ ಸ್ಪರ್ಧಿಸುವ ಅವಕಾಶವೇ ಸಿಗದಿದ್ದರೆ, ಅವರ ರಾಜಕೀಯ ಆಸಕ್ತಿ ಕುಂದಬಹುದು. ಇದು ವ್ಯಕ್ತಿಗಷ್ಟೇ ನಷ್ಟವಲ್ಲ, ಸ್ಥಳೀಯ ಮಟ್ಟದಲ್ಲಿ ಹೊಸ ನಾಯಕತ್ವ ಬೆಳೆಸಬೇಕಾದ ಪಕ್ಷಗಳಿಗೂ ದೀರ್ಘಕಾಲದ ಸವಾಲಾಗಬಹುದು.

ಹೊಸ ಮುಖ ಎಂದರೆ ಕೇವಲ ಕಡಿಮೆ ವಯಸ್ಸಿನ ಅಭ್ಯರ್ಥಿಯಲ್ಲ. ಜನರ ಸಮಸ್ಯೆಗಳನ್ನು ಆಲಿಸುವ ತಾಳ್ಮೆ, ಪ್ರಾಮಾಣಿಕತೆ, ಅಭಿವೃದ್ಧಿಯ ದೂರದೃಷ್ಟಿ, ಆಡಳಿತದ ತಿಳಿವಳಿಕೆ ಮತ್ತು ಜನರೊಂದಿಗೆ ನಿರಂತರ ಸಂಪರ್ಕ ಹೊಂದಿರುವ ವ್ಯಕ್ತಿಯೇ ಸಮರ್ಥ ನಾಯಕನಾಗಬಲ್ಲರು. ಇಂತಹ ಗುಣಗಳನ್ನು ಹೊಂದಿರುವ ಯುವಕರು ಮತ್ತು ಹೊಸ ಅಭ್ಯರ್ಥಿಗಳನ್ನು ಗುರುತಿಸಿ, ಅವರಿಗೆ ಜವಾಬ್ದಾರಿ ವಹಿಸುವುದು ರಾಜಕೀಯ ಪಕ್ಷಗಳ ಕರ್ತವ್ಯ. ಹಿರಿಯರ ಅನುಭವವನ್ನು ಬಳಸಿಕೊಳ್ಳುವುದರ ಜತೆಗೆ ಹೊಸಬರಿಗೆ ಸ್ವತಂತ್ರವಾಗಿ ಕೆಲಸ ಮಾಡುವ ಅವಕಾಶ ನೀಡುವುದೂ ಅಗತ್ಯ.

ಕುಂಸಿ ಕ್ಷೇತ್ರದಲ್ಲಿ ಮುಳುಗಡೆ ಸಂತ್ರಸ್ತರ ಸಮಸ್ಯೆಗಳೂ ಸೇರಿದಂತೆ ರಸ್ತೆ, ಕುಡಿಯುವ ನೀರು, ಶಿಕ್ಷಣ, ಆರೋಗ್ಯ, ಕೃಷಿ ಮತ್ತು ಉದ್ಯೋಗದಂತಹ ವಿಚಾರಗಳು ಆದ್ಯತೆ ಪಡೆಯಬೇಕಿವೆ. ಈ ಸಮಸ್ಯೆಗಳನ್ನು ಅರ್ಥಮಾಡಿಕೊಂಡು, ಸಂಬಂಧಪಟ್ಟ ಇಲಾಖೆಗಳೊಂದಿಗೆ ಸಮನ್ವಯ ಸಾಧಿಸಿ, ಸರ್ಕಾರದ ಯೋಜನೆಗಳು ಜನರಿಗೆ ತಲುಪುವಂತೆ ಮಾಡುವ ಪ್ರತಿನಿಧಿಗಳು ಬೇಕಾಗಿದ್ದಾರೆ. ಅಭ್ಯರ್ಥಿಗಳ ಆಯ್ಕೆಯ ಸಂದರ್ಭದಲ್ಲಿ ಅವರ ಹಿಂದಿನ ಸಾರ್ವಜನಿಕ ಸೇವೆ, ಜನಸಂಪರ್ಕ, ಕಾರ್ಯಕ್ಷಮತೆ ಮತ್ತು ಕ್ಷೇತ್ರದ ಅಭಿವೃದ್ಧಿಗೆ ಹೊಂದಿರುವ ಬದ್ಧತೆಯನ್ನು ಪರಿಶೀಲಿಸಬೇಕು.

ಹಿರಿಯ ನಾಯಕರಿಗೆ ಮತ್ತೆ ಸ್ಪರ್ಧಿಸುವ ಅವಕಾಶ ಇರಬಾರದು ಎಂಬುದು ಈ ಚರ್ಚೆಯ ಆಶಯವಲ್ಲ. ಪ್ರಜಾಪ್ರಭುತ್ವದಲ್ಲಿ ಸ್ಪರ್ಧಿಸುವ ಹಕ್ಕು ಎಲ್ಲರಿಗೂ ಇದೆ. ಆದರೆ ಪಕ್ಷದೊಳಗೆ ಅವಕಾಶಗಳ ಹಂಚಿಕೆ ನ್ಯಾಯಸಮ್ಮತವಾಗಿದೆಯೇ, ಹೊಸಬರಿಗೆ ಬೆಳೆಯಲು ಅವಕಾಶ ದೊರೆಯುತ್ತಿದೆಯೇ ಎಂಬುದನ್ನು ಪಕ್ಷಗಳು ಆತ್ಮಾವಲೋಕನ ಮಾಡಿಕೊಳ್ಳಬೇಕು. ಹಿರಿಯರು ತಮ್ಮ ಅನುಭವವನ್ನು ಮುಂದಿನ ತಲೆಮಾರಿಗೆ ಹಂಚಿಕೊಂಡು, ಹೊಸ ನಾಯಕರನ್ನು ಬೆಳೆಸುವ ಜವಾಬ್ದಾರಿಯನ್ನೂ ವಹಿಸಿಕೊಳ್ಳಬೇಕು. ನಾಯಕತ್ವವೆಂದರೆ ಅಧಿಕಾರವನ್ನು ನಿರಂತರವಾಗಿ ತಮ್ಮಲ್ಲೇ ಉಳಿಸಿಕೊಳ್ಳುವುದಲ್ಲ; ಮುಂದಿನ ನಾಯಕರನ್ನು ರೂಪಿಸುವುದೂ ಆಗಿದೆ.

ಕುಂಸಿ ಕ್ಷೇತ್ರದ ಮತದಾರರೂ ಅಭ್ಯರ್ಥಿಗಳ ಆಯ್ಕೆಯಲ್ಲಿ ಪಕ್ಷದ ಹೆಸರು ಅಥವಾ ವೈಯಕ್ತಿಕ ಪ್ರಭಾವಕ್ಕಷ್ಟೇ ಮಹತ್ವ ನೀಡದೆ, ಜನರ ನಡುವೆ ಇದ್ದು ಕೆಲಸ ಮಾಡುವ ಸಾಮರ್ಥ್ಯವನ್ನು ಪರಿಗಣಿಸಬೇಕು. ಚುನಾವಣೆಯ ಸಂದರ್ಭದಲ್ಲಿ ನೀಡುವ ಭರವಸೆಗಳಿಗಿಂತ, ಸಾರ್ವಜನಿಕ ಸೇವೆಯ ದಾಖಲೆಯೂ ಅಭಿವೃದ್ಧಿಯ ಸ್ಪಷ್ಟ ಕಾರ್ಯಯೋಜನೆಯೂ ಮುಖ್ಯವಾಗಬೇಕು.

ಕುಂಸಿಗೆ ಬೇಕಿರುವುದು ಕೇವಲ ಹೊಸ ಮುಖವಲ್ಲ; ಹೊಸ ತಲೆಮಾರಿಗೆ ರಾಜಕೀಯದಲ್ಲಿ ಭವಿಷ್ಯವಿದೆ ಎಂಬ ವಿಶ್ವಾಸ ಮೂಡಿಸುವ ನಾಯಕತ್ವ. ಹಿರಿಯರ ಅನುಭವಕ್ಕೆ ಗೌರವ ನೀಡುತ್ತಲೇ ಹೊಸಬರಿಗೆ ನ್ಯಾಯಯುತ ಅವಕಾಶ ಕಲ್ಪಿಸುವುದು ರಾಜಕೀಯ ಪಕ್ಷಗಳ ಜವಾಬ್ದಾರಿ. ಇಲ್ಲವಾದರೆ ಪಕ್ಷಕ್ಕಾಗಿ ದುಡಿಯುವ ಯುವಕರಿಗೆ ಅವಕಾಶ ಯಾವಾಗ ಎಂಬ ಪ್ರಶ್ನೆ ಉಳಿಯುತ್ತದೆ. ಹೊಸ ತಲೆಮಾರಿನವರಿಗೆ ಅವಕಾಶ ನೀಡುವುದು ವ್ಯಕ್ತಿಗಳ ಬದಲಾವಣೆಯಷ್ಟೇ ಅಲ್ಲ, ರಾಜಕೀಯ ವ್ಯವಸ್ಥೆಯ ಭವಿಷ್ಯವನ್ನು ಬಲಪಡಿಸುವ ಪ್ರಯತ್ನವೂ ಹೌದು. ಕುಂಸಿ ಕ್ಷೇತ್ರದ ಅಭ್ಯರ್ಥಿಗಳ ಆಯ್ಕೆಯಲ್ಲಿ ಈ ಆಶಯಕ್ಕೆ ಎಷ್ಟು ಮಹತ್ವ ದೊರೆಯುತ್ತದೆ ಎಂಬುದನ್ನು ಕಾದುನೋಡಬೇಕಿದೆ……